اسمع حكاية صَبِيَّة .. كَأَنَّهَا النِّسْمَة .. تِحْيِي بْعُيُونْهَا اللَّيْل .. وَتِرْسِم النِّجْمَة
تِلْعَبْ فِي حِجْرِ الأَرْض.. مِطْمِنّه وَسَارْحَة .. وَالضَّحْكَة تِبْدِرْ أَمَلْ .. وِتْطْرَحْ الفَرْحَة
وَفْ وَسْطِ لَمَّةْ شَجَرْهَا .. والزَّيْتُونْ .. جَالْهَا اللَّئِيمْ يِتْمَسْكَنْ .. وَبِمِيتْ لُونْ
لَابِسْ قِنَاعَ الحَمَل .. وَالنِّيَّة غَدَّارَة .. شَايِلْ فِي جَيْبُه الخَرَابْ .. وَبِإِيدُه زُمَّارَة
وَقَالَ يَا بِنْتِ الحَلَالْ .. بَايِنْ عَلَيْكِ المَرَض .. خُدِي الدَّوَا مِنْ إِيدِي .. الله عَلِيه العَوَض
البِنْتْ مِنْ جَهْلِهَا .. بِبَشَاعَةِ الأَيَّامْ .. مَدِّتْ إِيدِينْ الصَّفَا .. وِمْصَدَّقَة له الكَلَامْ
وَفْ لَمْحَة بَانَتْ سْنَانُه .. وَالكَلَبْشِ اتْشَدّ .. كَشَّرْ عَنِ الأَنْيَابْ .. وَالسِّلَاحِ اتْمَدّ
وَافْتَكَرْ إِنِّ الحِكَايَة.. خِلْصِتْ خَلَاصْ بِالدَّمّ .. وَإِنِّ الصَّبِيَّة خَلَاصْ.. اسْتَسْلِمِتْ لِلْهَمّ
لَكِنْ يَا وَيْلَكْ يَا دِيب.. مِنِ الجِدُورْ فِي الطِّينْ .. البِنْتْ جُوَّه السِّجْنْ.. بِتْنِسِجْ طُوفَانْ في سْنِينْ
مِنْ جُوَّه سِجْنِ الوَجَعْ.. نَبتْ لِلضَّعِيفْ أَسْنَانْ .. رِجَّالَة طَالْعَة مِنِ الشُّقُوقْ.. زِلْزَالْ يِقِيدْ بُرْكَانْ
فَاضَ الطُّوفَانْ يَا دِيب.. وَمَوْجُه مَا بِيْهْدَاشْ.. وَاللِّي بْتِشْرَبْ دِمَاهُمْ.. مَا بِيْمُوتُوشْ بْبَلَاشْ
بُصْ فِي سَمَاكْ تِلَاقِيه.. النَّصْرِ عَمَّالْ يِلُوحْ .. وَالشَّمْسِ رَاجْعَة تِدَاوِي.. الجُرْحِ وَالمَجْرُوحْ
يَا دِيبْ اِسْمَعْهَا كِلْمَة.. آخِرْ خُلَاصِة القَوْلْ .. طُولْ مَا النَّفَسْ شَغَّالْ.. لِسَّه الطُّوفَانْ مَوْصُولْ
وَاللِّي مَسْتَسْلِمْشِ لِكْ.. يِبْقَى انْتَصَرْ لَوْ مَاتْ .. مِينْ قَالَ أَنَا اتْغَلَبْت؟.. دَا لِسَّه فِيهْ جَوْلَاتْ
البِنْتْ حُرَّة خَلَاصْ.. وِالدِّيبْ مسيرُه يِغُورْ .. وَالأَرْضْ هِتْهِلِّ بُكْرَة.. بْأَلْفِ ضَيْ وِنُورْ
